تاج الملوك :D

فى البدايه احب اعتذر لدكتور lioromio عن التاخير الكتير اوى فى الرد على التاج ....

وكمان باشكره وباشكر H2Wعلى الفرصه الجميله دى

والتاج بيقول ايه ؟؟؟

تحدث عن نفسك فى عشر جمل ... بس انا بقى مش هاعد .... كرم زياده طبعا :p

يمكن اللى خلانى قلت تاج الملوك هو انى اول حاجه تبادرت لذهنى كلمه تاج الملوك ..

من الاعلانات طبعا :D

اقول ايه ............؟؟


-- باحب النعناع جدا جدااا يمكن لو طول النهار نعناع مش هازهق

-- احب اسمع الموسيقى الهاديه ......... كمان او بيانوا اى حاجه كلاسيك ومن اكتر المقطوعات اللى بحبها المقطوعه اللى بتبدا مع فتح المدونه

-- احب القراءه جدااا وكمان باحب اكتب وباحب الشعر والفنون لكن انواع معينه .. وخصوصا من الشعر

-- مجنونه .. وجوايا تناقضات كتيرة اوى وعجيبه جدااا وبيقولوا عليا طيبه ..بادخل مود الحزن كتير اوى يمكن لو عدى يوم
من غيره يبقى فى حاجه غريبه

-- باحب الاطفال جدااا جداااااااااااااا وساعات باحس انى طفوليه نوعا ما

-- تلقائيه وكلامى مصدره واحد ... هو تفكيرى ومش باقتنع باى حاجه بسهوله

-- باهزر كتير وده من وجهه نظرى عيب فيا نفسي اتخلص منه .... يمكن باكتب اللى عاوزاه بهزار لكن ساعات هدفى مبيوصلش واللى بيوصل الهزار

-- جد ساعات كتيرة ده لو مكنش على طول ....لكن مع اصحابى مش باظهر ده لدرجه انه لوحد ميعرفنيش هيقول هبله :D

-- باكره نفسي ساعات كتيرة يمكن لانى مش راضيه عنها دايما

-- احب العلم والمعرفه ودايما افكر فى حاجات عجيبه مش حب منى فى كده لكن مخى هو اللى بيفكر كده وده يمكن اللى خلانى اقول مجنونه

-- باحب اما اعمل حاجه تكون مظبوطه او كامله وكذلك الناس تقوم بدورها كويس يعنى انسانه عاديه جداا

-- مبحبش التكرار سواء لافكار او اقوال باحب كل جديد

-- اعشق الورقه والقلم والنت والكمبيوتر لانهم بالنسبه ليا حاجه كبيرة اوى اوى من خلالها باعبر عن ارائى اللى ما
باعرفش اوضحها فى الواقع نتيجه الخجل الزايد

-- ممكن اعتبر نفسي غامضه بالنسبه للى حوليا لان محدش يعرف عنى كتير وخاصه من ناحيه تفكيري
اللى عايشين معايا وحوليا مشافوش منى غيير الصمت نتيجه الخجل وعندهم رنا طيبه وعلى نياتها J

-- يمكن لانى باحب انعزل بتفكيرى شويه ومش من النوع اللى يحب يشرح كل حاجه بيعملها او لان اللى حوليا مش مدينى الفرصه دى ......... يا عالم

-- ساعات كتيرة باحس ان فى ناس بتبصلى على انى فذلوكه وباحب اتفذلك فى ردودى وتفكيرى وناس تانيه شايفه العكس انى متواضعه
لكن للى انا متاكده منه انى مش سليمه بنسبه 100% يعنى اكيد فيا حاجات وحشه وحاجات كويسه يمكن قليله لكن اهو ربنا يكرم

-- من الكلمات اللى مبحبش اسمعها شكرا وميرسي على حاجه قدمتها تكفى ابتسامه فى عين حد ساعدته وكمان مبحبش كلمات التوجيه
بتخنقنى


-- نرفوزه وعصبيه يمكن باصبر خارج نطاق الخدمه قصدى البيت لكن فى البيت باتعصب كتير وساعتها باحس بالغباء

-- اكتر حاجه تعصبنى انى محدش يقدر تعب او مجهود عملته وكذلك الاستخفاف بتفكيرى وطريقتى فى الحياه سواء كان كل ده تافه او كويس المهم هو فى نظرى انا ايه

-- باحس انى رغايه جدااا مع انى فى الواقع باتخرس قدام الناس L

-- مش واثقه فى نفسي ومتردده جدااا يمكن اما باقعد مع نفسي بابقى واثقه فيها فوق الخيال لدرجه الغرور لكن قدام الناس بتقلب العكس تماما
معترفه ان عندى مشكله فى التواصل مع الناس والمجتمع بصورة سليمه بعيد عن الخجل والتردد واتمنى ان الوضع ده يزول

-- باحب علم النفس اوى اوى وكذلك اعشق العربيه الفصحى واحب اتكلم بيها

-- احب النقاش موووووووووووت لكن بعيد عن الجدل العقيم واللى مبنى على التخمينات .... بيعصبنى

-- بيقولوا ارائى موزونه لكنى ساعات باحس ان ميزانتى مش مظبوطه وده لانى باحبها تكون وافيه وبادور على الافضل زى اى حد اكيد

-- احب اعرف حاجه عن كل حاجه واتمنى ان الحاجه تكبر وتبقى حاجات

-- اخيرا مقصرة دراسيا جدا يمكن لانى مبعرفش احفظ وده بيضيعنى فى الاخر وطبعا باحب صيدله جدا جدا جدا لكنها
بتخذلنى دايما وباصبر وان شاء الله خير

طولت اوى وقلت عشرات مش عشره لكنها كانت فرصه سعيده اوى علشان اتكلم

ودلوقتى وقت تمرير التاج ودى مشكله بالنسبه ليا :) لانى مش اعرف ناس كتير عندهم مدونات وغالبا اللى اعرفهم جالهم نفس التاج

اذن فالتاج مفتوح لاى شخص بيزورنى هنا فى المدونه وعنده مدونه

ولكن هاغير السؤال وهاقول ..

ساعات كتيرة بنفكر ... ده اكيد طبعا وطبيعى .. لكن ساعات فى حاجات بتقول لنفسك لا مش هافكر فيها لان قله التفكير فى
الوضع ده افضل

ده بعيدا عن الامور الدينيه والغيبيات .... يا ترى ايه هى الحاجات دى ؟؟؟ اتكلم براحتك :)